Përmbytjet e dhjetorit

 1 dhjetor: Përmbytjet edhe këtë fundviti nuk e kursyen Shkodrën dhe fshatrat rreth saj. Koha e keqe dhe reshjet e shumta që ranë e vazhdojnë të bien, bënë që mijëra njerëz të braktisin shtëpitë e tyre gjysmë apo krejtësisht të mbuluara nga uji. Bashkë me strukturat e shtetit dhe të policisë, edhe Malteser Shqipëri, pjesë e Komisionit të Emergjencave të Qarkut Shkodër, është vënë në gjendje gatishmërie për t’u ardhur në ndihmë banorëve të përmbytur, veçanërisht Komunitetin Rom dhe Egjiptian të prekur nga kjo fatkeqësi. Të gjithë bashkë mund të bëjmë diçka, sado të vogël, për ta ndihmuar tjetrin në vështirësi.

 

5 dhjetor: Gjatë këtyre ditëve të vështira për mbarë zonat e përmbytura, mijëra familje kanë mbetur të izoluar nga uji, duke mos pasur mundësi as të furnizohet me ushqimet bazë. Mes të tjerash, Malteser Shqipëri mbështet familjet e Komunitetit Rom dhe Egjiptian në lagjen “Tejbunë”, duke u ofruar rreth 95 familjeve të izoluara bukë dhe ujë.

 

7 dhjetor: Çdo ditë, ka familje që evakuohen, duke lënë pas shtëpitë e tyre tashmë të pabanueshme për shkak të përmbytjeve. Ata strehohen në konvikte, qendra pritjeje apo edhe në hotele. Familje të shumta të komunitetit Rom janë evakuuar në qendrën e pritjes në Rrenc. Malteser Shqipëri u gjendet atyre pranë me paketa ushqimore.

 

9 dhjetor: Një tjetër lagje e përmbytur, e papërgatitur për t’u bërë ballë pasojave të reshjeve të shumta dhe ujit që çdo ditë e më shumë e ngre nivelin e vet, duke hyrë brenda shtëpive dhe duke penguar lëvizjet e banorëve. Sipas kërkesës së Bashkisë, Malteser Shqipëri tashmë gjendet duke përmbushur detyrën e saj në lagjen “Livade”, për të mbështetur banorët e saj me paketa ushqimore.

 

 

18 dhjetor: Çdokush që e njeh vuajtjen dhe fatkeqësinë, që ka dhimbje në zemër, është bashkuar për të ndihmuar popullin e Shkodrës dhe të fshatrave përreth në këtë situatë emergjente në të cilën ata gjenden. Mes tyre, Motrat gjermane në Fushë-Arrëz, i ofrojnë Malteser Shqipëri materiale ushqimore për personat në nevojë, në familje ose në qendrat e evakuimit.

 

18 dhjetor: Malteser Shqipëri kërkon një tjetër bashkëpunim, atë të CISOM – Trupave Italiane të Ndihmës së Shpejtë (Corpo Italiano di Soccorso, Ordine di Malta – CISOM). Gatishmëria e tyre bën që me të shpejtë t’iu përgjigjen kësaj kërkese dhe dy vullnetarë të CISOM me një fugon me ndihma ushqimore dhe higjienike udhëtojnë për në Shkodër. Malteser Shqipëri i është shumë mirënjohëse CISOM, drejtorit të saj Dr. Mauro Casinghini për gatishmërinë për t’u ardhur në ndihmë familjeve të prekura nga përmbytjet. Mirënjohja është shenjë falënderimi, që edhe pse mund të duket e paktë, flet shumë.

 

19 dhjetor: Në ambientet e zyrës së Malteser Shqipëri, stafi dhe vullnetarë të saj bashkë me 2 vullnetarët e CISOM, përgatisin paketa ushqimore dhe higjienike për familjet në nevojë. Pakot e përgatitura përbëhen nga materialet e sjella nga motrat e Fushë-Arrëz, CISOM dhe Malteser.

 

20 dhjetor: Një tjetër lagje e prekur nga përmbytjet është lagja “Iliria”. Dy vullnetarët e CISOM, bashkë me vullnetarë të Malteser Shqipëri janë drejtuar në këtë lagje për të ndihmuar familjet e prekura, duke shpërndarë rreth 100 pako ushqimore dhe higjienike.