Të dhurosh nga vetja…

Kanë mbetur edhe shumë pak ditë nga kremtimi i festës së Krishtlindjes. Tashmë njerëzit nxitojnë t’i japin fund përgatitjeve që kanë mbetur. Duket se gjithçka është e përkryer. Të gjithë duan që të jenë bashkë me familjet e tyre për ta përjetuar sa më plotësisht këtë festë e cila rrezaton vetëm dashuri e mirësi.

Megjithatë për shumëkënd, kjo festë sjell trishtim, sepse janë larg të dashurve të tyre, ose të braktisur…
Tek shtëpia “Misionaret e Bamirësisë Nënë Tereza” motrat kujdesen shumë për fëmijët dhe vajzat me aftësi ndryshe, të cilëve mundohen t’u japin ngrohtësinë dhe dashurinë që u mungon. Një ndihmesë të veçantë japin edhe vullnetarët e Malteser, të cilët çdo javë janë pranë tyre me aktivitete të ndryshme. Nuk kanë munguar as në përgatitjet dhe në festën e Krishtlindjes, e cila ka filluar paradreke dhe ka zgjatur për disa orë.
Së pari, vullnetaret janë marrë me estetikën e vajzave të rritura, u kanë prerë flokët, i kanë krehur dhe i kanë ndihmuar të vishen bukur, ndërsa djemtë kanë ndihmuar në zbukurimin e shtëpisë së vajzave, duke rregulluar edhe Betlehemin.
Më pas gjithçka është veshur nga velloja festive. Vajzat kishin përgatitur këngë e kërcime si falënderim për çdo moment që vullnetarët e Malteser janë të pranishëm në jetën e tyre me aktivitete dhe festime. Por edhe vullnetarët kishin përgatitur diçka ndryshe nga herët e tjera. Njëri prej tyre, kishte marrë violinën me vete dhe luajti disa pjesë të muzikantëve të shquar botërorë. Pas shijimit të muzikës, të gjithë bashkë kanë kënduar, kërcyer e festuar. Ashtu si vajzat, edhe vullnetarët e kanë përjetuar bukur të festuarit me ta, sepse të japësh nga vetvetja është gëzim, por edhe të marrësh është një përvojë e veçantë. Të kuptosh se jeta nuk ofron gjithçka, të kuptosh rëndësinë e të qenit bashkë me persona që vuajnë dhe të bashkëndash me ta, është më bukur se të kesh gjithçka materiale për vete. Dashuria është ajo që për njeriun vlen…